მეცნიერებმა დაადგინეს, რატომ არის ზებრა შავ-თეთრი.
აღმოჩნდა, რომ შავ-თეთრი შეფერილობა ნაკლებ კრაზანას იზიდავს. იმისათვის, რომ ეს ჰიპოთეზა დაემტკიცებინათ, მეცნიერებმა კვლევა სამ ცხენზე ჩაატარეს.
პირველი შავად შეღებეს, მეორე - თეთრად, ხოლო მესამე ზებრის ფერებში გადაღებეს. ყველა მათგანს ტყავზე სპეციალურ წებოვანი სითხე გადაუსვეს. გარკვეული დროის შემდეგ კი, მათზე მიწებებული კრაზანების რაოდენობა დაითვალეს.
საბოლოო ჯამში, ყველაზე ცოტა მწერი, სწორედ იმ ცხენს დაესია, რომელიც შავ-თეთრ ზოლებად იყო შეღებილი.
მეცნიერები ადრეც ფიქრობდნენ, რომ ზებრებს ასეთი შეფერილობა თავდაცვაში ეხმარებოდათ, მაგრამ უამრავმა კვლევამ დაადასტურა, რომ მტაცებლებს შავ-თეთრი ზოლები საერთოდ არ აფრთხობს.
კიდევ ერთმა კვლევამ დაადგინა, რომ ზებრის ძირითადი ფერი შავია და მათ თეთრი ზოლები აქვთ და არა პირიქით. თეთრი ზოლები მას ჩასახვიდან ცოტა ხანში უჩნდება.
თუმცა გამონაკლისიც არსებობს. მაგალითად, 2004 წელს კენიაში ვეტერინარებმა ზებრის აბსოლუტურად თეთრი ნაშიერი აღმოაჩინეს. ამასთან, ეს არაორდინალური ცხოველი თავს საკუთარ ჯოგში სრულიად ბუნებრივად გრძნობდა.
|